Baraja Baso Inggirih

Guru : Boceh, cubo buek kalimat dalam baso inggris yang di mulai jo kato "I"

Boceh : I is ...

Guru (langsuang mamotong) I am bukan I is

Boceh : I am the ninth letter of the alphabet

Guru : Dasar si Boceh €$&÷¥^#£#

Rindu Ramadhan

Boceh : Mak Sudi... awak lah taragak bana puaso di bulan Ramadhan...

Mak Sudi : Alhamdulillah.... Ramadhan juo taragak basuo jo urang-urang nan taragak puaso

Boceh : Ooo gitu mak?

Mak Sudi : Iyo.. makonyo inyo datang 10 hari labiah capek tiok tahun

Sejarah Saruang

Murid sado e. Walaupun tiok daerah di Indonesia itu biaso pakai saruang, tapi sabananyo saruang bukan budaya Indonesia. Saruang berasal dari Yaman.
Dibaok ka Indonesia dek pedagang dari Gujarat.
Nah sia nan tau, kiro-kiro saruang masuak lewat ma?
Boceh bisa jawek ? Saruang masuak lewat ma kiro-kiro?

Boceh : Kalau ndak lewat kaki yo lewat kapalo buk

Guru : ¥&#^÷£&×*$

Batang Jambu di Halaman Rumah

Pulang sikola, dek hari angek jo sadang puaso, si Boceh duduak basanda di batang jambu di halaman rumah nyo.
Dek di sewai angin.. lamo-lamo takalok lah si Boceh.
Tibo-tibo ado buah jambu nan jatuah pas di kapalo si Boceh.. langsuang tajago si Boceh sambia marabo-rabo dek tagaduah lalok siangnyo.
Mak Sudi nan mancaliak kajadian tu langsuang datang ka si Boceh.

Mak Sudi : Ha ha.. baa dek marabo-rabo waang  boceh?

Boceh : Awak sadang lamak lalok. Ado jambu jatuah ka kapalo awak.

Mak Sudi : Boceh, itulah kebesaran Allah untuak awak. Inyo siapkan batang nan rindang untuak bataduah, tapi buah nyo ketek2 sajo. Cubo kalau buahnyo sagadang jo sakareh karambia. Bocor kapalo Boceh dek nyo.

Boceh : Alhamdulillah mak Sudi. Sabana sampurna ciptaan Allah tu.

Kuciang Nyo Samo

Guru : Boceh.. baa dek karangan waang tantang kuciang ko samo jo karangan nyo si Codoang... mancenek waang yo?

Boceh : Ndak buk Guru..   kuciang nyo nan samo... jadi caritonyo samo...

Benua Amerika

Guru : Boceh cubo tunjuak an di peta.. nan ma nan benua Amerika

Boceh : Nan iko buk

Guru : Batua... Kini Codoang, sia menemukan benua Amerika

Codoang : Boceh lah buk.. kan ibuk nan manyuruah cah ko

Guru : Codoang ^$£@&#&#*#*&#

Bara Jadinyo

Di kelas, si Boceh ditanyo guru matematika nyo

Guru : Boceh, kalau waang punyo pitih sapuluah ribu, sudah tu apak ang maagiah waang pulo pitih sapuluah ribu... bara pitih waang kini Boceh?

Boceh : Sapuluah ribu buk

Guru : Payah.. waang ndak tantu caro baretong dong

Boceh : Ibuk nan payah, ndak tantu baa apak den doh

Urang Giloooo

Si Boceh sadang pai ka tampaik kawannyio nan karajo di rumah sakik jiwa.
Tibo-tibo datang lah pejabat antah dari ma langsuang batanyo ka si Boceh :

Pejabat : Pak, banyak nan sakik di siko ?

Boceh : (takajuk dek ditanyo) ooo lai banyak Pak

Pejabat : Baa caronyo apak manantukan urang tu alah cegak atau alun gilonyo ?

Boceh (langsuang kalua mantikonyo, langsuang manjawek) : Ndak payah bana doh Pak, awak suruah nan gilo tu ka kamar mandi, di situ bak mandi alah di isi panuah. Awak agiah ka urang gilo tu sendok jo gayuang. Awak suruah mangosongkan bak mandi tu.

Pejabat (maraso pandai) : Kalau alah ndak gilo, pasti nyo pakai gayuang yo. kan labiah capek... (sambia galak sengeang)

Boceh : Indak Pak, kalau ndak gilo, nyo cabuik sumbek di bawah bak mandi tu,,, kalua aia dalam bak tu kasadoalah e

Bini Den Mancibuak Tadi

Si Boceh sadang di Bank jo bininyo. Tibo-tibo ado perampok nan masuk. Indak pakai topeng, mukonyo cuma ditutuik jo tangan kida, bia ndak dikenal urang, tangan kanan pacik pistol.

Perampok : ndak ado nan buliah mancaliak muko den. Nan mancibuak den tembak.

Tibo-tibo ado nan sok barani mancaliak ka perampok tu... Langsuang kanai tembak

Perampok : itu contoh kalau mancibuak.. Pasti den tembak

Antah apo nan ado di pikiran si Boceh, mungkin dek sadang bacakak jo bininyo. Tibo-tibo si Boceh basorak : Bini den tadi mancibuak !!