Anak Pertamo ?

Si Boceh manelpon ka rumah sakik.

Boceh (panik) : Dok, bini den hamil, lah sambilan bulan. Kini sadang kontraksi ko ha.. tiok tigo minik.

Dokter : Iko anak pertamo yo?

Boceh : Batea waang mah... iko lakinyo....

Wawancara Karajo (2)

Si Boceh kini sadang mancari sales untuak manjua galeh nyo dari rumah ka ramah.
Tibolah sorang mambaok map barisi riwayat karajo nyo.
Bakaruik kaniang si Boceh mambaco riwayat karajo paja tu.

Boceh : Waang ndak pernah jadi sales doh, baa dek barani minta gaji tingi ?

Pelamar Karajo : Tantu iyo Pak, labiah barek karajo awak kalau awak alun ado  pengalaman lai. Jadi wajar ambo minta gaji tinggi

Boceh : @)(&#*^#&*# (kalegha waang mah)

Ndak Bisa Internet

Kini karajo si Boceh manjua sambungan Internet.
Pagi-pagi buto inyo alah tarimo telpon dari customernyo.

Customer : Pak, baa caronyo ko. Awak lah cubo konek ka internet pakai CD yg apak agiah patang.

Takana lah dek si Boceh, CD nan nyo agiah patang. CD nan isinyo tantang caro konek ka internet.

Boceh : Alah pak puta CD tu?

Customer : alah... tapi ndak juo bisa doh?

Boceh : apo merek komputer apak?

Customer : komputer? Waden ndak punyo komputer doh... iko pakai VCD karaoke mah.. biasonyo suaronyo rancak.. pakai CD waang ndak basuaro nyo doh.

Boceh : ^$€×*#;#&&#&#

Ndak Kenal

Bini si Boceh protes : Baa udah ndak pernah bantuak urang sabalah rumah?

Boceh : Bantuak sabalah rumah baa mukasuik nyo tu?

Manjaweklah bini si Boceh : Laki rang sabalah tu tiok ka pai karajo pasti nyo cium bininyo dulu. Baru inyo barangkek karajo. Uda sarupo itu pulo lah. Bia sanang ati awak.

Boceh : Dalang kau mah piak, kenal se indak waden jo bini rang subalah tu doh. Manga ka den cium pulo?

Mancari Sumbangan

Antah baa lah carito e. Si Boceh di daulat untuk jadi panitia mancari sumbangan untuak mambangun lapangan volley di kampuang nyo.
Tapasolah si Boceh bapidato.

"Bapak2 dan Ibu yth.
Kami sampaikan bahwa berkat dukungan Bapak dan Ibu sadonyo. Akhirnya dana untuak mambangun lapangan iko akhirnyo takumpua juo"

Tacangang lah panitia nan lain jo para hadirin tadi... acara mancari sumbangan baru di mulai tapi si.Boceh mangecek an kalau dana alah takumpua.
Baa lah caritonyo ko ha.

Tadanga si Boceh malanjuik kan pidatonyo.

"Lai ka di dukuang ambo untuk mambangun lapangan ko ?"

Manjaweklah urang sadonyo, "Laiiiii !!"

Boceh : Kalau ambo ado masalah dalam mambangun lapangan Ko.... lai namuah samo2 manolong ambo?

Basorak lo urang sadonyo baliak, "Laiii!!"

Bapidato si Boceh baliak..
"Masalahnyo pitih nan alah cukuik untuak mambangun lapangan ko. Kini alun sampai di panitia lai. Lai tau apak2 jo ibuk2 di ma pitih tu kini?"

Sakali ko sadonyo basorak, "Indaaaak!!!"

Bapidato si Boceh baliak,"pitihnyo masih ado di dompet jo di saku Bapak2 jo Ibu nan hadir kini... jadi ambo minta tolong bana pitih tadi langsuang di sarahkan ka panitia. Panitia alah siap manjapuik ka tampaik duduak Bapak2 jo Ibuk2.
Tarimo kasi:

Hadirin : (dalam hati) kalegha si Boceh mah.. tapaso lo sadonyo manyumbang......

Asal Usul Manusia

Anak si Boceh batanyo ka apaknyo : Pak dari ma asal usul manusia tu?

Boceh : Manusia awalnyo diciptakan sapasang, namonyo Adam jo Hawa. Awak ko kasado alah e katurunan Adam jo Hawa.

Anak : Ooo gitu yo Pak

Tapi dek apaknyo acok ndak sandereh kalau di ajak serius, diulangnyolah pertanyaan tadi ka amak nyo.

Iko jawek amaknyo : Manusia sacaro teori, asanyo dari monyet, dari tahun ka tahun manyasuaikan dari, bantuak badan jo caro bapikianyo. Jadilah manusia jaman kini.

Paniang lah anak si Boceh mandanga duo versi ko.

Datang nyo baliak ka si Boceh : Pak, baa dek cek amak, awak berasal dari monyet, tapi apak kecekan awak berasal dari adam jo hawa.

Tamanuang lah si Boceh mandanganyo.

Sasudah bapikia sabanta, nyo caliak sakaliliang ndak adoh nan mancaliak,  di jaweknyo lambek-lambek ka anaknya sambia babisiak :

Kalau amak ang mungkin iyo keturunan monyet.. tapi apak keturunan Adam jo Hawa..

SMS si Boceh

Si Boceh masih di lua kota, rencana hari ko ka pulang. Tapi dek banyak juo urusan lai. Alun juo bisa pulang. Tapaso lah di undur duo hari.
Di SMS lah bininyo dek si Boceh.

Boceh : Diak, uda alun bisa pulang lai. 2 hari lai mudah2an lai bisa.
Itupun cuma di rumah samalam sajo, sudah tu harus pai ka lua kota baliak. Tolong siapkan pakaian Uda untuak jalan baliak 3 hari yo.

Malamnyo si Boceh kirim sms baliak

Boceh : Diak, uda lai barasaki. Uda baok kan galang ameh untuak adiak yo.

Bininyo : iyo Da. Tarimo kasi yo Da. Uda iyo sayang bana jo adiak.

Boceh : indak... cuma mamastikan sajo SMS uda tadi pagi lai adiak baco

Bininyo : $^&@&÷;#&# (Boceh kalera)

Sabana Buto

Si Boceh tacangang bana.... baa dek bininyo sampai duo kali maagiah sadakah ka pengemis buto nan lewat cah ko.

Boceh : Baa dek sampai duo kali adiak maagiah sadakah ka pengemis tadi.

Bininyo : Haruslah....Ndak tadanga dek uda apo nan di kecek kan nyo sasudah ambo agiah sadakah nan pertamo tadi?

Boceh : Iyo ndak tadanga di den doh

Bininyo : Pakak udah mah.... inyo kecek an waden sabana rancak. Sabana manih.

Boceh : Ooo Iyo sabana buto pengemis cah ko mah

Carito si Bos

Antah apo nan tajadi, si Bos di kantua nampak sadang sanang hatinyo. Inyo tagak di tangah ruangan sambia bacarito nan lucu-lucu.
Sado nyo galak gadang takekeh-kekeh mandanga carito si bos.
Kecuali si Boceh. Muko nyo rato rato sajo ndak barubah.
Batanyolah si Codoang ka si Boceh..

Codoang : baa kok waang diam sajo.. nan lain sadang galak-galak mandanga carito si bos.

Boceh : Waden ndak paralu ikuik galak doh.. bulan bisuak den pindah karajo....

Codoang : $£^#*÷&

Wawancara Karajo

Si Boceh sadang mancari tukang insinyur untuak usaho nyo.
Banyak lah nan datang malamar karajo. Tamasuak si Boin, tukang insinyur lulusan universitas paliang terkenal sa Indonesia.
Sasudah batonyo iko itu. Akhirnyo si Boceh batanyo

Boceh : Bara gaji nan waang mintak?

Boin : Ndak banyak doh Pak. Mulai 10juta sajo untuak tahun pertamo karajo

Boceh : Ooo Nantun... kalau 10juta sabulan, tambah liburan ka lua nagari tiok tahun, tunjangan cuti, oto kantua jo rumah ambo sadiokan baa kiro-kiro?

Takajuik lah si Boin....

Boin : nDeh... bagarah apak mah.. (sambia galak-galak cangok)

Boceh : eeeee kan waang nan mulai bagarah mah.....

Taaaaaasarah

Bini mudo si Boceh nampaknyo sadang rusuah... mukonyo mambuduik sajo dari pagi.....

Dek hari alah siang, paruik lah lapa pulo, batanyo lah si Boceh ka bininyo..

Boceh : makan kama awak rancak Diak, lah lapa paruik mah.

Bininyo : tasarah udah se lah

Boceh : makan ayam pop lai nio Diak?

Bininyo : bosaan

Boceh : makan ikan baka baa? Lai katuju?

Bininyo : patang lah makan ikan baka juo

Boceh : makan pizza sajo wak?

Bininyo : tambah barek badan den beko.

Boceh : jadi aa nan adiak suko ?

Bininyo : taasaaarah

Boceh : &#%×£@&$&#*
(dalam hati) ndak kama lah ka di campak an paja ko...

Si Boceh Pasan Tiket Pesawat

Si Boceh sakali ko taragak pulo bajalan-jalan ka lua kota jo bininyo.

Lah duo jam barundiang, kasudahannyo kaduonyo supakaik ka pai ka Bali.

Tapi bininyo takuik naiak pesawat kalau lamo bana.... gamang wak cek nyo.

Boceh : Bia awak telepon kantua kapatabang ko dulu yo Diak, wak tanyo bara lamo kalau ka Bali.

Ny Boceh : Iyo Da.. bia tanang ambo.

Di telpon lah dek si Boceh kantua kapatang ko.

Boceh : Halo.... iko kantua kapatabang ko?

Operator : Iyo Pak... apo nan bisa kami tolong Pak?

Boceh : Bara lamo tabang kalau dari Padang ka Bali

Operator : Sabanta yo Pak....... (mukasuik operator tadi tunggu lah sabanta,  nyo ka batanyo ka kawan nan lain, tapi talipon lah di putuih dek ai Boceh)

Boceh ka Bini nyo : Lai tadanga dek kau.... Sabanta kecek nyo ... jaan takuik pulo..

Si Boceh Baraja Fisika

Si Boceh sadang duduak manis di kelas. Inyo sadang baraja fisika. Kini sadang mambahas tantang kecepatan, jarak dan lain-lain.

(Lai takana juo dek sanak pelajaran nantun?)

Tibo-tibo gurunyo batanyo :
Boceh, kalau si A naiak oto kecepatan 100 km/jam dari Kiktinggi ka Padang. Sudah tu si B naiak oto juo kecelatan 100 km/jam dari Padang ka Kiktinggi.

Dima kiro-kiro si A jo si B basuo.

Langsuang si Boceh manjawek :
Kalau sakancang itu, basuonyo kalau ndak di pinjaro, klo ndak, di rumah sakik, pak Guru..

Guru : $€*#;$*#*@

Si Boceh Dapek Nilai 100

Kini sadang musim ujian di sikolah si Boceh.

Apak jo amaknya lah harok-harok cameh mamikiakan nilai ujian anak nyo nan terkenal paliang mada di sikola.

Dari jauh nampak lah si Boceh pulang dari sikola.

Amak : Baa ujian ang Boceh.. lai rancak nilainyo... ?

Boceh : Lai lah mak... aman tu mak.

Amak : Bara ponten ang tadi

Boceh : (tadiam sabanta) dapek saratuih den mak

Mandanga tu sanang lah hati amaknyo.
Tapi dek kalakuan si Boceh nan taralah, ndak picayo apak nyo jo nilai tadi doh.

Apak : Lai sabana nyo tu nilai waang, baa dek bisa dapek saratuih.. waang ndak pernah baraja nampak dek den doh?

Boceh : (agak lunak suaronyo) Iyo saratuih Pak, matematika 40 sudah tu bahasa indonesia 60... kan saratuih dek apak tu....

Apak jo Amak : %÷/#&&×*#&

Si Boceh Ba Komputer Baru

Dek tuntutan skenario... eh maaf tuntukan karajo, si Boceh harus mambali komputer untuk karajo di rumah.

Namonyo sajo komputer baru. Tantu banyak nan harus di install dek si Boceh. Mulai software untuak kantua  sampai software untuak nan lain-lain bagai.

Alah habih wakatu dari pagi sampai patang, dari patang sampai malam pulo. Sampai laruik malam baru lah si Boceh lalok.

Co itu lah taruih sampai ba hari-hari.
Tabik pulo rabo bini nyo mancaliak si Boceh asik jo komputer baru sajo.
Lah samo pulo jo babini baru mah, pikia bininyo.

Ny Boceh : Da... alah tu mah, sapanjang hari mancaliak komputer se taruih. Lah kalah pulo waden dek komputer burak tu mah. Lah bantuak babini mudo pulo uda mah.

Boceh : Baa ndak ka samo dek kau.....
Tiok den ma install software baru. Aden ndak bisa protes doh. Harus piliah satuju sen taruih. Kan samo.jo babini tu mah.

Gara-Gara HP Dual SIM Card

iyo babayo pakai HP 2 SIM Card

Si Boceh Talambek Sikola

Bu guru langsuang manyuruah si Boceh tagak di muko kelas dek si Boceh talambek datang.

Guru : Baa dek talambek waang Ceh?

Boceh : Tadi waktu di angkot ado urang nan kahilangan pitih 100ribu.

Bu Guru takajuik, alah barubah bana si Boceh kini, alah namuah manolong urang bagai.

Guru : La i batolong urang nan kahilangan tu Ceh?

Boceh : Indak buk

Guru : ha kalau ndak manolong urang tu? Baa dek waang telat sikola?

Boceh : Awak nunggu urang tu turun dari angkot buk, makonyo lamo.... talaik awak jadinyo

Guru : Untuak apa waang tungguan?

Boceh : Pitih nyo nan hilang tu awak ka duduak an.....

Bini si Boceh Nio Turunkan Barek Badan

Si Boceh sadang duduak tamanuang di teras rumahnyo..biasonyo lai duduak jo bininyo nan gapuak sangaik tu... tapi kiniko duduak surang.

Lewatlah si Codoang. Langsuang di saponyo si Boceh...

"Baa buruak bana manuang waang Ceh...
Alun makan ang dari pagi lai..."

Boceh : aden alun makan lai, rang rumah pai basapeda kaliliang kampuang... nasi alun talatak lai

Codoang : manga nyo basepada kaliliang kampuang, rundo atau bajaga sate?

Boceh : kalegha waang mah.. urang rumah den nio langsing badan nyo. Nyo bae basepeda tiok hari. Alah 3 minggu co nantun, lah tigo minggu pulo waden talambek makan pagi.

Codoang : Sabalah Ceh, kan rancak tu. Baa hasilnyo basepeda salamo 3 minggu  ?

Boceh : Barek badan ndak bakurang,  tapi lah tigo sapeda hancua......

Hasil Ujian Si Boceh

Pulang sikola, si Boceh mambaok surek dari guru nyo untuak wali murid.
Kironyo isinyo nilai ujian si Boceh. Takajuik lah apak si Boceh mancaliak nilai si Boceh.

Apak : Baa dek buruak bana nilai ujian waang ko.. ndak baraja waang Boceh?

Boceh : Lai den baraja nyo Pak... tapi dek pilek mah, buruak nilai den dek e.

Apak : Bilo pulo waang pilek? Wakatu ujian patang kan lai sihaik-sihaik sajo mah.

Boceh : Ndak awak nan pilek doh Pak, kawan sabalah den nan pilek, jadi ndak masuak sikola nyo doh.

Si Boceh Sakik Gigi

Dek ndak kuaik manahan sakik giginyo lai.. akhirnyo si Boceh pai juo ka dokter gigi.
Antrinyo sabana panjang.. lamo bana dokter mamareso pasien nyo.
Sasudah antri sambia manahan sakik, akhirnyo tibo juo giliran si Boceh di pareso.
Sapuluah minik lamonyo muncuang si Bocah mangango sambia di ubek dek dokter gigi tu.

Boceh : Alah salasai dok?
Dokter Gigi : alun lai, cubo apak kaluakan lidah apak.

Dek doter nan manyuruah, tantu manuruik si Boceh ko. Anyo ulua kan lah lidah nyo kalua.
Dokter mamuta kurisi tampek si Boceh ka arah jendela.

Dokter Gigi : kaluakan lidah apak taruih yo.. sapuluah minik lah.. ndak lamo doh.
Boceh : mm mmm (ndak bisa mangecek dek lidah kalua, ma angguak angguak sajo)

Sapuluah minik sudah tu..

Dokter Gigi : Alah Pak.. tutuik lah muncuang apak lai
Boceh : (lega) iyo Dok.
Boceh : Batanyo ambo Dok. Untuak apo ambo kaluakan lidah tadi. Untuak maubek apo tu?.
Dokter Gigi :(sambia galak sengeang) iko rasio awak baduo yo, dek Boceh kawan dari ketek awak barani mambuka rahasio iko nyo. Lai amuah basumpah Boceh ndak maagiah tahu urang lain?
Boceh : Iyolah Ci (namo dokter gigi nyo mah, dek lah mangecek kawan dari ketek, sabuik namo se lai)
Dokter Gigi : Awak bacakak jo urang subalah rumah, jadi satiok pasien ambo suruah mancibia ka subalah.
Boceh : Kalegha kau mah Ci.

Untuak sanak nan dokter gigi, jaan tasingguang pulo yo.. iko untuak bagarah sajo mah

Si Boceh Sakik Mato

Si Boceh pai ka doktor mato. Antah apo pulo nan sakik kini..
Boceh : Dok, mato ambo raso tatusuak jarum rasonyo kalau minum kopi.. baa tu Dok?
Dokter : Makonyo Boceh, kalau ka minum, ambiak lah dulu sendok tu dari cangkia.... jaa  lansuang minum sajo..
Boceh : !!!

Si Boceh Pai Ka Dokter

Si Boceh bagageh maantakan anaknyo ka dokter.
Kironyo anak si Boceh dek lasak bana, talulua dek e kunci lamari.
Dokter : Sajak bilo kejadian nyo ko?
Boceh :  Lah saminggu labiah Dok.
Dokter : Haaa, kok baru kini di baok kamari
Boceh : Itu lah Dok, minggu kapatang kunci serapnyo lai ado... tadi hilang pulo kunci serap nyo Dok.

Si Boceh Main Facebook di Sikola

Si Boceh iyo sabana mada, di kelas main facebook juo. Caliak lah statusnyo,"Waden main facebook di kelas.... guru ndak tau doh..."

Caliak lah sia sajo nan komen.

GURU :
Kalua waang dari kelas.

CODOANG :
Den tunggu waang di kantin.

AMAK :
Baraja lah, jaan main fb ka fb juo.

PACAR :
Lah baliak dari kampuang? Dima jadinyo nenek di makamkan, ibo ati awak, dek Boceh ndak tibo awak ulang taun tadi malam.

NENEK :
Waden hiduik jo baru, kalegha waang mah.

Anak Si Boceh Kanai Tegur Guru

Anak si Boceh nan laki-laki, nan pamain bola jo palala tu  baru pulang sikola, lansuang nyo cari amaknyo di dapua.
"Mak, iko ado surek dari guru untuak urang tua murik"
Takajuik lah bini si Boceh mandanga, lansuang nyo buka sirek dari guru nantun.
Kironyo itu surek teguran dari guru untuak anak si Boceh,"Anak Bapak/Ibu lai elok laku, pandai jo sangaik picayo diri, tapi ano talalu  banyak bamain jo anak padusi di sekolah"

Galak sengeang lah bini si Boceh mambaconyo, langsung di baleh no surek tu,"tarimo kasih bu guru, apo kiro-kiro jalan kaluanyo, agiah tahu lah ambo, apak no sarupo tu pulo..."

Si Boceh Pai Weekend

Si Boceh pai ba jalan-jalan jo bininyo kalua kota. Nginap di hotel nan bantuak sarang buruang dek tinggi sangaik.

Antah baa lah mulainya...si Boceh bacakak gadang jo bininyo.

Sadang angek-angek nyo bacakak, si Boceh manelpon lah ka manager hotel tu..

"Pak minta tolong awak Pak.. Awak sadang bacakak jo bini awak"

Heran lah manager hotel tu,"Ondeh Pak.. kalau apak bacakak, kami ndak nio sato doh, itu urusan apak baduo"

Marabolah si Boceh mandanga kecek manager tu,"Bini den ka bunuah diri, ka maloncek dari jendela"

Dijaweklah dek manager tu,"Kalau itu apak ndak usah cameh, jendela kami sadonyo ndak.bisa di buka"

Dibaleh di si Boceh,"Iyo itu bana masalahnyo, baa dek ndak bisa di buka dari tadi......"

Si Boceh Manjua Buku

Dek sadang ndak barasaki, pai lah si Boceh ka tampaik kawan-kawan nyo biaso bakumpua.
Mukasuik ka batanyo jo minta tolong untuak panyambuang hiduik di Jakarta.
Basuolah di situ jo si Codoang, kawan areak konco palangkin si Boceh sajak ngenek.
Si Codoang ko sadang duduak tamanuang. Dakek si Codoang batumpuak buku ka galeh si Codoang.
Sabana banyak buku nyo. Ado buku dari lua nagari bagai.

"Baa kaba Codoang, baa dek tamanuang bana, tambah buruak bantuak ang tampak di den kalau sadang tamanuang tu"

Manjawek lah si Codoang,"Ba ba ba a.. ndak ka, ndak ka ta ta manuang dek ang.. ca ca caliaklah ga ga leh den ko... a a alun a a do nan laku"
Si Codoang ko iyo agak gagok stek.

Bapikia lah si Boceh, mungkin bisa nyo manjua buku ko mah.

" Lai Buliah den tolong an manjua kan buku ko?:

"Bu bu buliah, ju juakan lah, a a awak bagi labo e"

Barangkek lah si Boceh mambaok buku ko..

Alun tangah hari, alah baliak si Boceh ka tampaik si Codoang.
Kironyo alah habis buku tu sapalastik asoy.

Takajuik si Codoang.

"Ka ka ma bu buku den tadi?"

"Lah den jua lah, ko pitihnyo ha... bara den dapek bagian nyo?"

Takajuik bana si Codoang, inyo lah bakulialiang alun ado nan laku..si Boceh jalan sabanta lah habih sapalastik asoi buku ko.

"Ba baa caro ang ma mamnjua Ceh, sa sa sabanta se lah ha habih buku den"

Tagalak si Boceh manjawek,"Aden mandanga waang mangecek ndak saba den doh.... tabik pangana den dek nyo..."

"Jadi tiok basuo urang nan kiro-kiro bapitih, ambo tiru gaya waang mangecek"

Aden tanyo ka urang tu,"A a apak, ni ni nio mam mam mambali buku ko... a a atau wa wa den ba ba ba cokan bu bu bukunyo?"

Kalera waang Bocehhhhhhh....

(Ilang gagok si Codoang)

Handphone Untuak Amak di Kampuang

Dek lah sukses di kota, lah barumah, lah ba oto, ba hanphone rancak. Takana pulo lah dek si Boceh ka mambalian handphone untuak amaknyo di kampuang.
Di balian nyo lah handphone, lengkap jo kartu sarato pulsa no bagai.

(nan mambaco lai saelok ko ka amak awak sorang-sorang?)

Tibolah hanphone baru tu di kampuang.
Dek taragak jo si Boceh nan elok laku tadi, di telon nyo lah langsung si Boceh ko.
Tapi apo nan tadango dek amak si Boceh ?
Telepon yang Anda hubungi sedang sibuk, cobalah beberapa saat lagi.

Lah di cubo duo tigo kali, itu juo jaweknyo baru.

Marabo lah amak si Boceh ko,"Ondeh si Boceh durako, mantang-mantang alah kayo, sibuk taruih sajo jaweknyo"

Si Boceh Ditangkok Polisi

Si Boceh ditangkok polisi dek malangga lampu merah,
Polisi : Ma surek2 nyo, SIM jo STNK?
Boceh : Iko Pak
Polisi : Haaa, iko kan fotokopi, aslinyo di ma?
Boceh : ambo asli Lubuak Basuang Pak.
@$&#&@

Si Boceh Pasan Pizza

Dek mancaliak kawan sabalah rumah mamasan pizza, si Boceh indak pulo amuah kalah...
Kalau makan di kadai pizza tantu ndak nampak dek urang sabalah rumah kalau inyo makan pizza.
Ba usaholah inyo mancari, baa caronyo mamasan pizza ko ka rumah.
Dapek juo kasudahannyo dek si Boceh caronyo. Inyo telp lah nomor delivery pizza ko. Nyo pasan nan paliang gadang. Bia nampak dari jauah, mungkin itu nan ado di pikiran si Boceh.
20 minik sudah tu datang juolah pizza nan di tunggu-tungu tadi.
Sasudah di baia, indak pulo pizza ko di baok ka dalam rumah doh... bia nampak dek urang sabalah rumah.. balatakan dulu di muko rumah..
Ndak lamo sudah tu.. baru di baok ka dalam rumah dek si Boceh. Di bukak lah kotak pizza tadi.
Tapi.... takajuik gadang si Boceh ko...
Pizza nyo beda samo pizza yang dipasan rang sabalah rumah. Nan disabalah rumah dapek pizza nan diatehnya banyak samba e..macam-macam pulo.
Nan dek si Boceh ko... roti sajo nyo.... polos...
Marabo lah si Boceh ko.. nyo telpon baliak ka kadai pizza tu.
"Yuang, baa dek pizza den ndak basamba ko.. poloih se ha... kalau rang sabalah rumah nan mambali waang agiah banyak sambanyo.... baliak an pitih den baliak"
Tacangang lah nan manarimo telepon..
"Iyo Pak.. maaf, mungkin ado nan salah. Bia awak kirim gantinyo...."
(Sarupo iko kalau bakadai makanan sanak, kalau salah di ganti....)
20 minik sudah tu datang lah tukang anta pizza ka rumah si boceh....baru sampai langsuang di boceh marabo, "Baa kadai waang ko Yuang. Apo nan waang kirim ko"
"Buka langsuang ganti nyo tu. Beko salah kirim pulo baliak."
Dibukak lah dek tukang anta pizza tadi. Iyo lai ndak salah kirim,  langsuang di makan dek si Boceh.
"Sarupo iko nan den pasan" ndak sarupo nan tadi doh.. poloih sajo pizza nyo"
"Maaf pak. Buliah ambo caliak kiriman nan tadi Pak?"
"Buliah, caliak lah di dalam, di ateh meja makan"

Masuak lah tukang pizza tadi ka mancaliak kiriman nan salah tadi.

Ndak lamo inyo kalua, masam muko paja ko.

"Baa? Alah ang caliak karajo ang tadi? Jaan salah kirim jua lai yo. Kecek an ka bos waang tu. Pambali tu rajo mah"

Manjaweklah tukang anta pizza tadi....
"Ndak salah kirim doh Pak.... Apak mambuka bungkuih nyo tabaliak. Nan di ateh kabawah.
Tantu roti e sajo nan nampak"

Ondeeh tabaliak kironyo...

 

Dari Kabun ka Kabun

Tasabuiklah si boceh namonyo, inyo marantau ka Jakarta. Sakali wakatu inyo taragak jo amaknyo di kampuang. Sampai di kampuang batanyolah amaknyo ka si boceh.
Amak,"Di ma waang bakarajo di Jakarta Ceh?"
Boceh,"Di kabun siriah namo tampaiknyo mak"
Amak,"Kalau tingga di ma ?"
Boceh,"Kalau tingga lai indak jauah dari sinan mak, namo tampaiknyo kabun kacang"
Amak,"Ondeh Boceh... kalau dari kabun ka kabun juo.. manga pulo waang sampai ka Jakarta, kabun waden sajo banyak di siko. Ndak usah lah pulang ka Jakarta. Urus sajo kabun amak di siko"
Boceh,"Iyo pulo yo mak" (sambia gauik kapalo)