Si Boceh Ka Psikiater

Si Boceh baliak ka psikiaternyo baliak, satangah protes inyo sampaikan keluhannyo :

Boceh : Dok, kan alah dua tahun ambo maraso tiok hari  ado ula di bawah tampaik tidua ambo

Dokter : Iyo, Apak harus yakin kalau itu cuma perasaan Apak sajo

Boceh : Iyo alah ambo cubo saran dokter tu salamo duo tahun, tapi baru tadi malam baru hilang perasaan sarupo itu, baru sanang lalok ambo Dok.

Dokter :Alhamdulillah, apo nan Apak karajokan, kok tibo-tibo bisa barubah (bakaruik kaniang psikiater tu}

Boceh : Kapatang kami mamelokan pintu rumah, Ambo carito ka tukang pintu nan sadang karajo itu masalah ambo. Inyo langsuang mamotong kaki tampek tidua ambo, malamnyo hilang perasaaan ado ula di bawah tampaik tidua tu.

Dokter : (antahlah yuang) Ooooooooo

Si Boceh Baraja Matematika

Kini di kelas si Boceh sadang baraja baretong.

Guru : Codoang, kalau waang punyo pitih 100,  sudah tu pitihnyo di bagi duo jo si Awen, bara pitih waang kini.

Codoang : Barek hati den ka mambagi ka si Awen mah buk guru. Tapi kalau harus di bagi juo, dek awak tingga 50 lai.

Guru : Iyo santiang Codoang, baretong nyo lah rancak, sampilik nyo nan alun ilang lai.

Guru : Boceh, kalau waang punyo pitih 100, sudah tu saparampek di agiah ka si Codoang, saparampek lai di agiahkan ka si Awen. Bara tingga pitih waang kini.

Boceh : 99,5 buk.

Guru : (*#^€÷*@*@&@&

Nasihaik Mak Sudi (versi Bini Ideal)

Sasudah salasai baralek gadang, mak Sudi (1, 2, 3, 4) basuo jo si Boceh di kadainyo. Batanyolah si Boceh ka mak Sudi, apo sajo kriteria padusi nan rancak ka di jadian bini?

Sudi : Iyo cocok bana waang batanyo jo waden Boceh, umua den alah 60, bini den batigo. Manuruik den ado 4 macam nan rancak, pertamo, nan taat baibadah, supayo ado kawan wak ka sarugo, nan kaduo nan suko bagarah, bia sanang awak tiok hari, nan katigo, nan pandai mamasak, bia awak sanang di rumah, nan ka ampek dokter, bia ado nan manjago awak bia ndak sakik.

Boceh : Iyo bana payah mancari nan sarupo mamak sabuik tadi mah

Sudi : Ado cieklai nan harus waang kana Boceh.

Boceh : Apo tu Mak?

Sudi : Jaan kumpuakan ka ampek nyo dalam ciek rumah.....

Undangan Baralek

Mak Sudi rang gaek kayo tu mangirim undangan baralek ka si Boceh. Takajuik si Boceh mancaliak foto pre wed nan ado di undangan tu.

Baa ndak ka takajuik, Mak Sudi alah 60 tahun, padusinyo mungkin baru 20 tahun.

Ndak lamo sasudah baralek, si Boceh basuo jo mak Sudi. Batanyolah si Boceh ka Mak Sudi.

Boceh : Mak, iyo hebat mamak yo, lah 60 tahun umua, tapi dapek bini umua 20an, baa caronyo tu Mak?

Mak Sudi : Waden kecek an ka inyo umua den alah 89 tahun

Boceh Naiak Taxi

Kalua dari Tanah Abang, iyo sabana banyak balanjo si Boceh. Lah hampia putuih pinggangnyo ma angkek baban.

Ka naiak angkot, indak ado nan arah ka tampaik nyo tingga. Ka naiak taxi, pitih lah sayuik pulo, salain tu jaraknyo indak pulo jauah bana doh. Baa lah ka aka ko?

Tibo-tibo ado taxi nan baranti dakek si Boceh, tantu manawarkan jasa maantakan si Boceh.

Boceh : Bang, berapa kira-kira ongkos sampai ke jalan dekat musajid itu? (Sambia manunjuak ka musajik ndak jauah dari situ)

Sopir Taxi : Paling mahal 15 ribu Pak

Boceh : Kalau barang-barang saya sebanyak ini berapa pula ongkos nya?

Sopir Taxi : Ooo kalau itu gratis Pak.

Boceh : Kalau begitu, tolong lah saya mengangkat barang-barang ini ke oto kamu, saya biar jalan kaki saja ke sana.

Sopir Taxi : &'/£@*^#!

Baa Caro No Mambuek Banjir?

Indak singajo, si.Codoang jo si Boceh basuo di notaris. Kaduonyo kironyo ka mambali rumah.

Codoang : Lah lamo awak ndak basuo, manga waang ka mari Boceh?

Boceh : Waden ka mambali rumah. Waang manga ka siko Codoang?

Codoang : Samo awak mah, waden ka mambali rumah, rumah den nan lamo tabaka, di ganti dek asuransi, den bali rumah baru di siko.

Boceh : Samo wak mah, waden ka mambali rumah, rumah den nan lamo kanai banjir, di ganti dek asuransi, den bali rumah baru di siko.

Codoang : Ooo samo cito wak yo. Tapi baa caronyo waang mambuek banjir Boceh ?

Boceh : &$€¥×&@^@&@£×

Si Boceh Sakik Gigi (3)

Si Boceh sakik gigi pulo (baliak). Pai lah inyo ka dokter gigi langganan nyo.

Salasai di pareso, diagiah ubek, tagaklah si boceh ka pulang. Tibo-tibo dokter giginyo mangecek :

Dokter : Boceh buliah ndak mintak tolong bana sakali ko?

Boceh : Minta tolong apo tu dok? Serius bana nampaknyo ko mah?

Dokter ; Lai namuah Boceh basorak sakareh-karehnyo, bantuak urang sakik di cabuik gigi ndak pakai ubek bius?

Boceh : (tacangang) Untuak apo tu Dok, takuik lah pasien nan lain mandanga. Pulang kasadonyo beko.

Dokter : Iyo itu bana... waden lah janji ka manjapuik rapor anak den. Pasien banyak juo baru nan antri.

Boceh : ha ha ha..  iyo galia dokter mah

==========
Carito si Boceh sakik gigi nan lain klik di siko jo di siko

Pistol Aia

Si Boceh protes ka apaknyo.

Boceh : Pak, baa dek apak balian pistol aia untuak anak Den? Kan apak pernah carito, kalau dulu, wakatu den apak balian pistol aia, sadonyo den tembak, rusak sado barang elektronik apak. Lah lupo apak caritonyo?

Angku (apak nyo Boceh) : Takana bana dek den mah, takana bana... kini giliran waang lai Boceh :) :)

Boceh : Ondeh..... (dalam hati : baleh dandam apak wak mah)

Ubek si Codoang

Si Codoang datang ka tampaik si Boceh jo muko lusuah bantuak baju ndak di pernah di tarika.

Boceh : Baa dek lusuah bana muko waang Codoang?

Codoang : Baa ndak ka rusuah, gara-gara sakik kapatang, kecek dokter waden harus makan ubek iko ciek tablet satiok hari salamo hiduik den (sambia mancaliak kan ubek nan baru di ambiak dari apotek)

Boceh : Tanang lah, banyak urang nan co itu juo. Harus minum ubek nan samo saumua hiduik.

Codoang : Indak itu nan den rusuahkan doh.

Boceh : Apo tu?

Codoang : Dokter maagiah ubek cuma 30 buah nyo.

Hasil Survey si Boceh (Jumlah Kato)

Codoang : Boceh, baa dek padusi tu labiah nyinyia dari pado laki-laki ?

Boceh : Ndak sarupo itu doh Codoang, kaduonyo samo sajo nyinyia nyo

Codoang : Baa lo kok samo dek waang ko?

Boceh : Ambo ndak sambarang mangecek doh, iko hasil survey mah.

Codoang : Apo hasil survey nyo tu.

Boceh : Banyak kato-kato nan kalua dalam sahari dari muluik padusi jo laki-laki tu samo banyaknyo. Kiro-kiro 10.000 kato sahari.

Codoang : Ooo co itu yo?

Boceh : Iyo, tapi ado beda nyo saketek

Codoang : Apo tu bedanya?

Boceh : Kalau laki-laki 10.000 kato itu dari pagi sampai malam, kalau padusi  dari laki-laki pulang karajo sampai malam.

Pakaian Dalam

Dek baru tarimo gaji, bini si Boceh, pai ka pasa. Dek sayang ka laki, di balikan nyo lah pakaian dalam untuak si Boceh.

Boceh : Ondeh, baa dek samo sajo warna jo bantuak e sadonyo? Kalau di caliak urang tantu di sangko urang tu waden ndak pernah baganti pakaian dalam.

Bininyo tadiam, sudah tu batanyo ka si Boceh : Urang nan ma nan uda mukasuik nan ka mancaliak?

Kini si Boceh nan tadiam...

Kecelakaan

Boceh : Diak, uda kecelakaan, wakatu ka pai ka tampaik si Upiak, oto sadang kancang, pas babelok, ban pacah, oto tabaliak, saketek lai masuak jurang

Lamo ndak ado tadanga jawaban apo-apo dari bini si Boceh doh..

Tapi akhirnyo bininyo manjawek juo : Si Upiak nan ma Da?

***

Bulan Madu

Dek lah paniang di tanyo taruih dek kawan-kawan SMA nyo, akhirnyo si Boceh manikah juo.

Wakatu bulan madu. Dek sayang ka bini, bangkik rajin si Boceh ko.
Pagi alah ka dapua si Boceh ko. Nyo buek kan lah nasi goreng jo teh angek untuak badua. Bini nyo ndak buliah ka dapua doh dek sayang nyo

Iyo sabana sanang bini si Boceh ko.

Bisuak pagi co itu juo baru, ado pulo roti baka jo kopi untuak baduo.. antah kama ka di cari laki co iko, baitu pikia bininyo.

Lah saminggu sarupo itu taruih, lah habih wakatu bulan madu. Ka babaliak ka rumah baliak.

Mangecek lah bini si Boceh ko : Uda iyo elok bana, sanang bana adiak, tiok hari uda siapkan makanan untuak adiak. Tarimo kasi yo Da.

Boceh : Iyo. Jaan sanang dulu. Co itu nan den nio tiok hari.. mulai bisuak giliran kau lai nan mamasak yo..

Botak

Pak, baa kok kapalo apak saketek bana rambuik nyo?

Boceh : itu dek apak banyak bapikia mah.. makin banyak bapikia makin banyak hilang rambuik e

Anaknyo : oooo... kalau baitu baa dek amak banyak juo rambuik e Pak?

Boceh : (bapikia : ondeh baa lah manjeweknyo ko ha) antahlah tanyo se lah ka amak waang

Ndak Sayang Lai

Sasudah makan malam, bini si Boceh antok sajo ndak basuaro.. mambuduik taruih.
Paniang si Boceh mancaliak buduik nyo..

Boceh : Baa dek mambuduik sajo dari tadi?

Bininyo : Uda ndak sayang jo ambo lai.

Boceh : Baa pulo ndak sayang?

Bininyo : Dulu kalau adiak masak, pasti uda makan saketek, potongan nan gadang uda agiahkan ka adiak... kini indak lai..udah habihkan dulu.. sisonyo saketek baru uda tinggakan.. kan ndak sayang namonyo lai

Boceh : Ooo itu..itu ndak dek uda ndak sayang lai ka adiak..

Bininyo : Apo juo namonyo kok ndak sayang..

Boceh : Itu dek karano masakan adiak kini labiah lamak..

Ada Anak Bertanya Pada Bapaknya (langau)

Anak si Boceh batanyo ka apaknyo : Pak, buliah langau wak makan?

Boceh : Ondeh.. jaan lah carito nan sarupo itu kalau sadang makan... salasaikan makan dulu... beko kalau alah salasai baru awak cito nan lain yo.

10 minik sasudah makan

Boceh : Apo cito tadi tu? Langau ndak buliah lah di makan... baa dek batanyo sarupo itu

Anaknyo manjawek : tadi ado langau di aia minun apak.. tapi lah habih pak minun... baa juo lai..

Si Boceh Dugem

Si Boceh di ajak si Codoang bajalan-jalan ka kota. Iyo banyak hiburan malam di sinan.
Masuak lah rang kampuang nan baduo ko ka situ. Ondeh mak, antah manga-manga sajo urang di situ.

Di caliak dek siboceh, iyo rato-rato nan ka situ parokok sadonyo.. sasak angok rang kampuang baduo ko di situ.

Pindah lah rang kampuangs ko ka suduik nan lain..tabulalak incek mato si Boceh mancaliak macam-macam padusi di sinan. Ado nan manari di panggung ado nan di ateh meja bagai.

Nampak dek si Boceh ado padusi nan gapuak manari di ateh meja tu.

Tapana lah si Boceh mancaliak padusi nan gapuak manari di ateh meja.

Mancaliak si Boceh tapana, batanyo lah si Codoang : "Baa dek tapana waang... suko pulo waang jo nan gapuak macam tu:

Si Boceh ndak manjawek.. tapana juo nyo baru mancaliak padusi gapuak manari di ateh meja tu.

Dek ndak manjawak, di tinjunyo bahu si Boceh dek si Codoang. "Hoooi ...Baa dek tapana waang... suko pulo waang jo nan gapuak macam tu"

Si Boceh manjawek...."Iyo rancak kaki nyo"

Codoang : Ondeh ... iyo lah batuka salero waang Boceh...lah suko pulo waang mancaliak kaki si gapuak tu.

Boceh : Waden ka mambaok nan sarupo itu ciek pulang"

Codoang : Haah... bini waang kama ka di campak an? Baa dek si gapuak ko pulo nan waang piliah?

Boceh : Ndak si gapuak tu doh......
Meja nyo waden suko.. kalau kaki meja tu ndak rancak ndak ka bisa bagai si gapuak tu manari di situ doh..
Lah patah mah...

Codoang : Kalegha.. den pikia kaki si gapuak nan waang caliak.... kironyo kaki meja e....

Boceh Minta Naiak Gaji

Boceh : Bos, capeklah naiak an gaji den bos..manyasa bos beko..

Bos : Baa dek manyasa pulo kalau ndak manaiak an gaji waang?

Boceh : Alah ado 3 perusahaan gadang nan manunggu den kini bos

Bos : Ondeh... perusahaan apo sajo tu...

Boceh : Telkom, PLN jo BNI bos

Bos : Ditarimo lamaran karajo waang di situ ? Iyo hebat waang Boceh.

Boceh : Indak co itu doh bos... tagihan nyo nan alah manunggu di rumah

Bos : ^$*@;$&#*

Tagak Sorang

Antah baa lah mulonyo, guru di kelas si Boceh marabo-rabo sajak tadi..
"Kok ado nan maraso bodoh di kelas ko tagaklah... bia den buek kelas khusus sore beko"

Tadiam lah sado murik di kelas tu...

Tibo-tibo si Boceh nan duduak di suduik belakang lansuang tagak.

"Waang nan maraso bodoh?"

Boceh : Ndak Pak... awak ibo mancaliak apak tagak sorang sajo....

Tanda Tangan di Dalam Gelap

"Pak, lai bisa apak mambuek tando tangan tapi ditampaik galok ndak ado cahayo?"

Boceh : Kalau cuma tando tangan bisa lah, kan ndak payah bana doh... apo nan ka di tanda tangani tu?

"Raport Sikola den Pak"