Matematika si Codoang

Boceh : Waang lai mandanga cito guru di kelas tadi Doang?

Codoang : Cito nan ma tu?

Boceh : Cito nilai matematik di sikola awak?

Codoang : ooo apo cito nyo?

Boceh : 75 persen anak sikola awak lai lulus ujian matematik nyo

Codoang : Oooooo mantun.. waden ndak lulus doh... berarti waden masuak di 15 persen nan ndak lulus yo?

Boceh : kuati waang lah.... makonyo waang ndak lulus... 100 - 75 sajo 15 cek waang..... $&€÷&@×&

Si Boceh ka Psikiater (2)

Boceh : Dok, alah satahun ko awak ndak bisa lalok, apo ubek nyo Dok

Dokter : Apak lah lalok siang nyo ndak ?

Boceh : Indak Dok, baa ka lalok siang, awak kaajo mah

Dokter : Pak marokok ? Ngopi atau minum alkohol ?

Boceh : Ondeh....  indak Dok, awak ndak marokok doh, ngopi sasakali sajo, kalau alkohol, kan haram Dok

Dokter : hmmm, mungkin Apak banyak masalah, jaan baok masalah tu sampai ka tampaik tidua

Boceh : tapi bini ambo ndak bisa lalok surang Dok.....

Dokter : Ondeh,,,,,,,

Suaro Binatang

Guru : Codoang, cubo tirukan suaro binatang nan waang tau?

Codoang : Guk guk guk.. suaru anjiang buk

Guru : Batua, kini waang Awen, suaro apo nan bisa waang tiru?

Awen : meong, meong, meong.. suaro kuciang bu guru.

Guru : Batua, kini waang Boceh, suaro apo nan bisa waang tiru?

Boceh : Halo cewek, godain kita dong... suaro buaya darat bu guru.....

Guru : /*¥#*#^$*#*#

BBM Naiak, Harago Pakaian Turun

Boceh : Ondeh lah naik pulo BBM ko ha... baa ka aka ko?

Codoang : Iyo, biasonyo nan lain menyusul pulo. Tapi ado juo nan mambuek ambo sanang tadi..

Boceh : Apo tu?

Codoang : Di kadai mak Sudi, lah nyo tulis gadang-gadang, kemeja 10.000, jean 15.000, celana panjang 12.500, pokoknyo sadonyo murah-murah.

Boceh : Ondeh.. lai sabananyo tu..?

Codoang : Lai... cuma adon nan waden ndak mangarati mukasuik tulisan nyo ciek?

Boceh : Tulisan apo tu.

Codoang : Tulisan nan paliang ateh.. ndak jaleh dek den doh mukasuiknyo.. tulisan nyo L.A.U.N.D.R.Y

Boceh : &$£÷&$.. iyo rang kampuang bana waang mah.

Diet Mudah ala si Boceh

Dek lingkar pinggang lah batambah juo, lah mulai sasak angok kalau bajalan jauh. Si Boceh akhirnyo pai ka dokter untuak konsultasi.

Boceh : Baa caro nyo mangurangi barek badan awak ko dok.

Dokter : Kalau ambo suruah bapantang makan nan lamak-lamak takuik nyo Boceh ndak takao beko... ka di suruah olahraga aerobik takuik ndak di karajokan.
Jadi ambo agiah caro nan paliang ringan sajo yo.

Boceh : (sumangaik mandanga kecek dokter) iyo dok, iyo bana tu... caro nan paliang ringan se lah.

Dokter : Caro nyo mudah... garik kan kapalo ka suok sudah tu ka kida ampek kali. Cukuik itu sajo

Boceh : Manggeleang kan kapalo mukasuik dokter?  kok mudah bana? Bara kali sahari awak garik kan kapalo co itu dok?

Dokter : Kalau ado nan mahidangkan atau maagiahkan makanan sajo.

Boceh : Oooo itu namonyo malarang ambo makan tu mah dok ......

Cabuik Gigi (2)

Si Boceh datang ka tampaik praktek dokter gigi langganannyo.

Boceh : Dok, bara biaya cabuik gigi kini?

Dokter : 350ribu

Boceh : maha bana mah, ndak bisa kurang lai tu?

Dokter : (sambia bakaruik kanianhnyo) ndak pake ubek bius nio Pak? 300ribu

Boceh : Maha juo baru mah, kurangan lah.

Dokter : Kalau mahasiswa kedolteran gigi nan mangarajokan untuk baraja baa Pak? 250 ribu nyo (mulai naiak tensinyo)

Boceh : maa juo baru mah dok

Dokter : Kalau gitu co iko lah.. bia anak kedokreran nan mangarajokan, indak pulo pakai ubek bius... ndak usah bagai apak baia ndak baa doh.. lai nio apak?

Boceh : lai, lai, ndak baa doh, bisuak ambo baok bini ambo kamari cabuik gigi... co itu se lah mancabuik nyo.

Si Boceh Ka Psikiater

Si Boceh baliak ka psikiaternyo baliak, satangah protes inyo sampaikan keluhannyo :

Boceh : Dok, kan alah dua tahun ambo maraso tiok hari  ado ula di bawah tampaik tidua ambo

Dokter : Iyo, Apak harus yakin kalau itu cuma perasaan Apak sajo

Boceh : Iyo alah ambo cubo saran dokter tu salamo duo tahun, tapi baru tadi malam baru hilang perasaan sarupo itu, baru sanang lalok ambo Dok.

Dokter :Alhamdulillah, apo nan Apak karajokan, kok tibo-tibo bisa barubah (bakaruik kaniang psikiater tu}

Boceh : Kapatang kami mamelokan pintu rumah, Ambo carito ka tukang pintu nan sadang karajo itu masalah ambo. Inyo langsuang mamotong kaki tampek tidua ambo, malamnyo hilang perasaaan ado ula di bawah tampaik tidua tu.

Dokter : (antahlah yuang) Ooooooooo

Si Boceh Baraja Matematika

Kini di kelas si Boceh sadang baraja baretong.

Guru : Codoang, kalau waang punyo pitih 100,  sudah tu pitihnyo di bagi duo jo si Awen, bara pitih waang kini.

Codoang : Barek hati den ka mambagi ka si Awen mah buk guru. Tapi kalau harus di bagi juo, dek awak tingga 50 lai.

Guru : Iyo santiang Codoang, baretong nyo lah rancak, sampilik nyo nan alun ilang lai.

Guru : Boceh, kalau waang punyo pitih 100, sudah tu saparampek di agiah ka si Codoang, saparampek lai di agiahkan ka si Awen. Bara tingga pitih waang kini.

Boceh : 99,5 buk.

Guru : (*#^€÷*@*@&@&

Bali Honda Baru

Sasudah manabuang 20 tahun, si Boceh tamanuang mancaliak buku tabungan nyo.
Bininyo batanyo : alah banyak saldo tabungan uda?

Boceh : Alah bisa awak kini mambali nan adiak minta 20 tahun nan lalu..

Bininyo : Jadi awak mambali honda baru Da?

Boceh : Ndak itu mukasuik ambo doh, awak alah bisa mambali honda keluaran tahun 1994.

Bininyo : ($&÷€*##^£÷*#

============
Catatan : kalau di Sumbar, seluruh sepeda motor di sabuik honda, jadi ado honda yamaha ado honda suzuki

Nasihaik Mak Sudi (versi Bini Ideal)

Sasudah salasai baralek gadang, mak Sudi (1, 2, 3, 4) basuo jo si Boceh di kadainyo. Batanyolah si Boceh ka mak Sudi, apo sajo kriteria padusi nan rancak ka di jadian bini?

Sudi : Iyo cocok bana waang batanyo jo waden Boceh, umua den alah 60, bini den batigo. Manuruik den ado 4 macam nan rancak, pertamo, nan taat baibadah, supayo ado kawan wak ka sarugo, nan kaduo nan suko bagarah, bia sanang awak tiok hari, nan katigo, nan pandai mamasak, bia awak sanang di rumah, nan ka ampek dokter, bia ado nan manjago awak bia ndak sakik.

Boceh : Iyo bana payah mancari nan sarupo mamak sabuik tadi mah

Sudi : Ado cieklai nan harus waang kana Boceh.

Boceh : Apo tu Mak?

Sudi : Jaan kumpuakan ka ampek nyo dalam ciek rumah.....

Undangan Baralek

Mak Sudi rang gaek kayo tu mangirim undangan baralek ka si Boceh. Takajuik si Boceh mancaliak foto pre wed nan ado di undangan tu.

Baa ndak ka takajuik, Mak Sudi alah 60 tahun, padusinyo mungkin baru 20 tahun.

Ndak lamo sasudah baralek, si Boceh basuo jo mak Sudi. Batanyolah si Boceh ka Mak Sudi.

Boceh : Mak, iyo hebat mamak yo, lah 60 tahun umua, tapi dapek bini umua 20an, baa caronyo tu Mak?

Mak Sudi : Waden kecek an ka inyo umua den alah 89 tahun

Boceh Naiak Taxi

Kalua dari Tanah Abang, iyo sabana banyak balanjo si Boceh. Lah hampia putuih pinggangnyo ma angkek baban.

Ka naiak angkot, indak ado nan arah ka tampaik nyo tingga. Ka naiak taxi, pitih lah sayuik pulo, salain tu jaraknyo indak pulo jauah bana doh. Baa lah ka aka ko?

Tibo-tibo ado taxi nan baranti dakek si Boceh, tantu manawarkan jasa maantakan si Boceh.

Boceh : Bang, berapa kira-kira ongkos sampai ke jalan dekat musajid itu? (Sambia manunjuak ka musajik ndak jauah dari situ)

Sopir Taxi : Paling mahal 15 ribu Pak

Boceh : Kalau barang-barang saya sebanyak ini berapa pula ongkos nya?

Sopir Taxi : Ooo kalau itu gratis Pak.

Boceh : Kalau begitu, tolong lah saya mengangkat barang-barang ini ke oto kamu, saya biar jalan kaki saja ke sana.

Sopir Taxi : &'/£@*^#!

Ngebut? Nggak lagi tuh

Rang kampuang sadang bakumpua di pos rundo. Sadang sumangaik mambahas jalan nan baru di aspal. Iyo barasiah kampuang nampaknyo sajak jalan di aspal, tapi makin lamo makin rami urang nan lewat, ndak saketek nan ngebut bagai.
Jadi kini sadonyo mancari aka baa caronyo bia urang lewat tapi ndak ngebut.

Ado nan mangecekan buek "polisi tidur".. tapi urang kampuang si Boceh indak katuju.. akhirnyo lewat tangah malam dapek lah kato supakaik, di buek sajo tulisan "NGEBUT, BENJOL"

Sabulan di caliak  ndak ado bedanyo doh.. co itu juo urang ngebutnyo.

Kumpualah rang kampuang tu baliak, supakaik pulo untuak manuka tulisan nyo jadi "BANYAK ANAK-ANAK, JANGAN NGEBUT"

Sabulan di caliak  ndak ado juo bedanyo doh.. co itu juo urang ngebutnyo.

Rapek sakaliko ado si Boceh nan tibo. Wakatu di tanyo, apo nan rancak di tulis di situ. Jawaban si Boceh lansuang di setujui. Kini satiok lewat kampuang si Boceh ado 5 buah tulisan di tapi jalan, tulisannyo :

100 METER LAGI ADA ASRAMA PUTERI

Kini ndak ado nan ngebut lai, sadonyo nio mancaliak penghuni asrama puteri tu.

Bagadang Pulo Baliak

Baru sajo talalok dek bagadang di pos rundo, si Boceh takajuik mandanga telpon rumah nyo badariang.

Di caliak jam, ondeh jam 2 hari baru.

Sambia takantuak-kantuak, di jawek lah telpon tu dek si Boceh.

Boceh : Halo

Yang nelpon : (langsuang marabo) waang kalau mamaliharo anjiang, tolong paratian urang sabalah rumah, jam 2 pagi anjiang waang manggonggong juo baru. Ndak bisa lalok den deh.

Boceh : Maaf Pak, maaf bana, bia ambo kuruang anjiang tu.. buliah tau sia namo jo nomor telepon rumah apak?

Dek lai sopan si Boceh manjawek, di agiah tau nyo lah dek nan manelpon, namo jo nomor telpon rumah nyo.

Bisuak nyo, persis jam yang samo, si Boceh manelpon baliak ka nomor tu.

Boceh : Pak, ambo nan apak telpon patang malam, dek apak ndak bisa lalok mandanga anjiang manggonggong taruih.

Yang Nelpon : Oo iyo.. manga waang manelpon jam 2 pagi co iko, waden baru ka lalok baru.

Boceh : Ndak manga-manga doh Pak. Cuma maagiah tahu, waden ndak pernah mamaliharo anjiang doh.

Yang Nelpon : haaa tu manga waang nelpon den kini?

Boceh : Bia apak tau rasonyo di telpon jam 2 pagi......

Bagadang di Pos Rundo

Dek acok di protes bininyo, sakali ko si Boceh mambaok bininyo ka tampaik si Boceh acok bakumpua tiok malam di rumah di suduik komplek.

Pulang dari situ, lansuang bininyo komen : Ondeh apo lah lamaknyo di sinan tu, main catua, kapalo nan ka paniang, kopi nyo indak pulo lamak doh, baun asok rokok, banyak nyamuak, makanan ubi jo pisang abuih, lagu no lagu dangdut, TV ketek pulo, gambarnyo alah hilang timbua....

Boceh : Makonyo Diak, jaan di anggap ambo pai basanang-sanang tiok malam ka situ.......

Reuni SMA (2)

Dek alun banyak nan datang, dari jauah si Boceh alah mancaliak si Sompong datang di acara Reuni 25 tahun tamaik SMA. Si Sompong terkenal paliang sombong, dari wakatu sikola sampai kini.

Si Boceh mangecek ka si Codoang : Waang diam sajo yo. Bia waden nan mangecek jo paja sombong ko.

Datanglah si Sompong ka tampaik si Boceh jo si Codoang.

Sompong : Baa kaba Boceh?

Boceh (cak icak ndak kenal) : nggg baiak. Awak baa?

Sompong : Lupo waang jo waden yo. Awak dulu samo-samo di kelas 3 IPA 2 mah.

Boceh (pasang tampang bego) : ooo iyo, apak dulu jadi guru apo? Alah lupo awak Pak.

Sompong : Kalegha waang mah, mantang-mantang alah tuo bana bantuak muko den mah...

=============
Cito reuni lain, silahkan klik di siko

Pelajaran Sopan Santun

Sasudah baraja tantang sopan santun di kelas, duduak lah Si Codoang, Si Awen jo Si Boceh di lapau ibuk di sabarang sikola.

Katigonyo bacarito tantang pelajaran tadi, sambia mambandiangkan jo apo nan di caliak di rumah surang-surang.

Si Codoang : Apak den kalau tibo di rumah jo ka pai bajalan pasti maagiah salam Assalamualaikum ka sado nan ado di rumah.

Boceh jo Awen : Iyo hebat apak ang Codoang

Codoang : Inyo tamaik pesantren dulu, tantu iyo sarupo itu.

Awen : Mamak den, Mak Sudi, kalau mangecek samo urang, kato-katonyo sopan bana, sanang urang mengecek jo inyo.

Codoang jo Boceh : Iyo hebat mamak ang Awen.

Awen : Inyo pensiunan guru, tantu iyo sarupo itu

Boceh : Nenek den di kampuang kalau inyo batuak atau inyo basin , pasti nyo tutuik muluik nyo. Kan co itu nan di tarangkan guru tadi...

Codoang jo Awen : Iyo hebat nenek ang Boceh

Boceh : Iyo, kalau ndak ditutuik,  beko talompek gigi palsu nyo kalua.

Buku Pintar

Si Boceh sadang hobi batukang. Dek baru baraja, rajin lah nyo batanyo jo mambaco buku. Sore hari pulang karajo, singgah lah nyo di toko buku punyo si Sudi.

Boceh : Mak Sudi, lai ado buku nan rancak. Ambo nio baraja mambuek kurisi dari kayu.

Bakuliliang lah mak Sudi mancari buku. Ndak lamo sudah tu, mak Sudi datang mambaok buku nan dicari.

Sudi : Iko buku nan cocok untuak waang Boceh, kalau lah ang baco, satangah karajo waang lah salasai mah.

Boceh : Kalau co itu... ambo bali buku tu duo buah ......

Asal Usul Manusia (2)

Kelas si Boceh terkenal paliang heboh. Kapalo suku nyo sia pulo lai kalau ndak si Boceh.
Dek karano guru-guru di sikola tu ka rapek, bia ndak heboh, tiok kelas di agiah tugas.

Guru : 3 jam ko. Ambo ndak ikuik di kelas, tapi ado tugas yang harus di salasaikan. Kalau tugas tu alah salasai, sadonyo buliah pulang.
Tugas nyo untuak diskusi tantang asal usul manusia, manuruik kelas ko, apo kah manusia berasal dari baruak atau dari manusia juo. Kalau kesimpulan alah ado, baritahu ambo. Sudah tu buliah pulang.
Bia ndak heboh, bia si Boceh nan mamimpin diskusi.

Sasudah maagiah tugas tu, pak Guru langsuang bagageh pai ka ruang rapek....

Tapi alun jauah bajalan dari kelas, tibo-tibo si Boceh alah maimbau guru tadi.

Boceh : alah buliah pulang awak Pak?

Guru : diskusi lah dulu. Kalau alah ado kesimpulan nyo. Baru buliah pulang.

Boceh : Alah ado kesimpulan nyo pak Guru. Manusia sadonyo asanyo dari manusia juo.

Guru : (tacangang) Baa caronyo kok capek bana maabiak kesimpulan?

Boceh : Awak tanyo ka kawan-kawan, sia nan asanyo dari baruak pindah duduak ka belakang, nan asa dari manusia pindah ka muko.... eee sadonyo pindah ka muko.. berarti kesimpulan nyo... manusia asanyo manusia juo.

Guru : £#;$£×*#

========

Carito tantang asal usul manusia nan lain, klik di siko

Sumbangan

Anak si Boceh balari ka balakang rumah mancari apaknyo.

"Pak ado urang datang minta sumbangan"

Boceh : Sumbangan untuak apo?

"Untuak kolam renang nan baru, nan di muko komplek Pak.

Boceh : Oo agiahlah aia sa embe ka nan minta sumbangan tu.