Hasil Survey Si Boceh (PR)

Kawan akrab si Boceh ado nan banamo Indrut, urangnyo pandai, sikola di Bandung di tampaik sikola nyo urang pandai tu.
Si Boceh iyo agak grogi kalau basuo jo kawan nan sorang ko. Jadi bia nampak pandai, bacaritolah inyo ka si Indrut ko.

Boceh : Indrut, waden alah mambuek survey tantang caro anak-anak kini mambuek PR.

Indrut : Ondeh iyo hebat mah, baa hasil survey waang tu?

Boceh : Anak-anak kini, rato-rato mangarajokan PR salamo 90 minik.

Indrut : Baa dek lamo bana?

Boceh : Jaan co itu Indrut, mantang-mantang waang pandai, iyo sabanta dek waang mangarajokan PR mah. Tapi kan tadi waden kecekan iko rata-rata.

Indrut : Oo iyo pulo yo. Jadi baa hasil survey nyo tadi?

Boceh : Anak-anak kini kalau mangarajokan PR paralu wakatu rato-rato 90 minik.
10 minik mambuka tas jo mamisahkan buku-buku nya nan sampai salusin di baok tiok hari.
20 minik nonton TV dulu
20 minik chating
10 minik pai kabalakang
20 minik makan snack
10 minik minta tolong apak jo mande nyo mangarajokan PR